Magaalada Boosaaso ayaa maanta laga sii daayay 17 ka mid ah Kalluumaysato ka soo jeedda Wadanka Iiraan kuwaas oo sanadkii la soo dhaafay laga qabtay Xeebaha degaanada Puntland.
Raggan maanta la sii daayay ayaa waxa ay u xirnaayeen iney si sharci darro ah uga kallumeysanayeen Xeebaha Puntland, intaasi kadibna ay gacanta ku dhigeen Ciidanka ammaanka Puntland.
Wasaaradda Kalluumaysiga iyo Khayraadka Badda Puntland oo kaashanaysa Wasaaradda Maaliyadda iyo Gadiidka ayaa maanta sii daysay kalluumaysatadaas kadib markii lagu ganaaxay lacag.
Maxaabiista Kalluumeysatada ah ee u dhashay dalka Iiraan ee maanta ay sii daysay Puntland ayaa horay loo dul dhigay lacag ganaax ah.
Kalluumaysatadaan la sii daayay ayaa lagu qabtay howlgal sannadkii hore ciidanka badda Puntland ka sameeyeen xeebaha gobolka Bari, waxaana howlgalkaasi lagu dilay Kabtankii Doonidaasi.
Puntland ayaa tan iyo waqtigaas gacanta ku haysay kalluumaystadaan, dowladda Iiran ayaa kaalin ka qaadatay sii daynta maxaabiista u dhashay dalkeeda, iyadoo horey uga codsatay Puntland in kalluumaysatadaan la sii daayo.
