Waxaa goor dhow Magaalada Laascaanood ka bilaabanaysa doorashada Madaxweynaha iyo Madaxweyne Ku-xigeenka maamulka Waqooyi Bari Soomaaliya. Amniga magaalada ayaa aad loo adkeeyay, iyadoo magaalada lagusoo rogay Bandow.
Ololaha Doorashadan ee musharaxiinta ayaa galay saacadihii ugu dambeeya, iyadoo loolanka siyaasadeed ee doorashada uu si xawli ah u socdo haatan. Hoolka doorashada ayaa goor dhow waxaa ka bilaabanaysa khudbadaha musharaxiinta.
Musharrixiinta u taagan madaxweynaha iyo madaxweyne ku xigeenka oo dhan toban musharax ayaa tan iyo xalay si xooggan ugu loolamayay kasbashada xildhibaannada, waxaana xog lagu kalsoon yahay ay xaqiijinaysaa in lacago dhowr boqol oo kun oo dolllar ay musharaxiintu ku bixiyeen xildhibaannada si ay codad uga helaan.
Hoggaamiyihii ku meel gaarka ahaa ee SSC-Khaatumo Cabdiqaadir Axmed Cali Firdhiye ayaa kamid ah musharrixiinta ugu cadcad doorashada, halka dhinaca kale qaar kamid ah musharrixiinta mucaaradka ay ku heshiiyeen in ay taageeraan cid kasta oo iyaga kamid ah oo gaarta wareegga ugu dambeeya ee doorashada, si ay codadkooda u mideeyaan, ugana guulaystaan haddii Firdhiye uu gaaro wareegga ugu dambeeya ee doorashada.
Doorashadan oo mid xiiso leh oo aad loo sugayo waxay go’aamin doontaa jihada siyaasadeed ee maamulka cusub ee Waqooyi Bari Soomaaliya iyo sida uu ula macaamili doono Dowladda Federaalka.
Magacyada musharaxiinta madaxweynaha.
Abdiqaadir Axmed Cali Firdhiye.
Rashiid Faarax Maxamuud.
Cabdirisaaq Khaliif Axmed.
Jamaal Maxamed Xasan.
Maxamuud Yuusuf Xasan.
magacyada musharaxiinta madaxweyne ku xigeenka.
Cumar Daahir Xasan.
Abdirashiid Yuusuf Jibriil.
Cabdirisaaq Maxamed Jaamac.
Cabdisataar Sheikh Cismaan Cumar.
Maxamed Cabdi Bulaale.
