Axad 29-June 2025 {RC}Sida lagu sheegay warbixin uu daabacay Mundo Deportivo, kooxda Barcelona ayaa si dhab ah uga fiirsaneysa inay ka qaado Marc-André ter Stegen kabtannimada haddii uu sii wato go’aankiisa ah inuu ku sii nagaado kooxda, xitaa haddii uu noqdo ciyaaryahan kayd ah xilli ciyaareedka soo socda.
Qaar ka mid ah xubnaha guddiga maamulka ee Barcelona ayaa doorbidaya in kabtannimada loo dhiibo ciyaaryahan joogto u ciyaara – sida Iñigo Martínez, halkii loo sii deyn lahaa Ter Stegen oo laga yaabo inuusan noqon xulashada koowaad xilli ciyaareedka cusub.
Si kastaba ha ahaatee, kabtannimada ciyaartoyda kale sida Frenkie de Jong, Ronald Araújo, Pedri, iyo Raphinha ayaa la filayaa inay sii haysan doonaan.
Caadi ahaan Barcelona waxay isticmaashaa habka waayo-aragnimada marka la dooranayo kabtanka – ciyaaryahanka ugu da’da weyn ama ugu muddada dheer kooxda ayaa xiran jiray calaamadda kabtannimada.
Hase yeeshee, xiriir xun ayaa la sheegay inuu ka dhex billowday Ter Stegen iyo kooxda, maadaama uu si adag uga hor yimid fikradda ah in la iibiyo – inkastoo ay jirto suurtagalnimada inuu kursiga keydka fadhiyo inta badan xilli ciyaareedka.
Si kastaba, ka qaadista Ter Stegen kabtannimada waxay u muuqan kartaa farriin taban oo saameyn ku yeelan karta isku duubnida kooxda.
