Tababarihii kooxda Chelsea ee Ray Wilkins ayaa aaminsan in Arsenal ay meesha ka saarto Mesut Ozil isla markaana uu badalkiisa noqdo xidiga hadda amaahda ku jooga kooxda Bournemouth ee Jack Wilshere, wuxuuna sheegay in Wilshere uu leeyahay tayo kasta oo uu kaga fiicnaan karo xidiga ree Germany oo aan wali ogolaan in uu saxiixo heshiiska cusub ee ay kooxdiisu u soo bandhigtay.
Arsenal ayaa ku dhibtoonaysa in ay Mesut Ozil iyo Alexis Sanchez ku qanciso in ay qalinka ku duugaan heshiisyo ay waqti dheer ku sii joogi karaan Emirates Stadium, waxayna dalbadeen mushaar qaali ah oo ay Arsenal ka cago jiidayso in ay bixiso.Tababarihii kooxda Chelsea ee Ray Wilkins ayaa Gunners u sheegay in ay muhiimada siiyaan Alexis Sanchez balse Ozil ay u ogolaadaan in uu baxo.
Tababarihii kooxda Chelsea ee Ray Wilkins ayaa yidhi: “Anigu maalinta oo dhan ayaan haysan lahaa Sanchez, waxaan dib u soo celin lahaa Jack Wilshere waxaan in uu baxo u ogolaan lahaa Ozil. Waxaan filayaa in Jack uu ku raaxaysanayo Bournemouth, xaqiiqdiina wuu ciyaarayaa todobaadkii yimaada iyo todobaadkii baxaba, waxaanad arki kartaa horumarka uu samaynayo”.
Ray Wilkins oo hadalkiisa sii wata ayaa yidhi: “Waxaa mahad ah in Jack uu soo gabagabeeyay dhibaatadii dhaawc ee waqtigii la soo dhaafay. Waxaan filayaa in Jack Wilshere uu la mid noqon karo ama uu ka fiicnaan karo Ozil. Waxa uu leeyahay balan qaad ka go’an oo garoonka dhexdiisa ah. Ozil waxa uu leeyahay taabasho layaableh laakiin marka uu la ciyaarayo kooxaha waa wayn waad waayaysaa”.
