Sabti 11, Oct 2025 {CBB}
Dowladda Jubbaland ayaa cabasho rasmi ah u gudbisay Qaramada Midoobay, taas oo ka dhan ah Dowladda Federaalka Soomaaliya, iyadoo ku eedeysay faragelin toos ah iyo burburin lagu hayo maamulka Jubbaland, gaar ahaan gobolka Gedo.
Madaxweyne Ku-xigeenka Jubbaland, Mudane Maxamuud Sayid Aadan, oo ku sugan gobolka Gedo, ayaa kulan fogaan-arag ah la yeeshay mas’uuliyiin ka tirsan Xafiiska Siyaasadda Qaramada Midoobay ee Soomaaliya (UNSOM). Kulanka ayaa diiradda lagu saaray xaaladda bani’aadantinimo ee gobolka Gedo iyo saameynta ka dhalatay ficillada dowladda Federaalka.
Madaxweyne ku-xigeenku ayaa ku eedeeyay Villa Soomaaliya in ay wado qorshe “guracan” oo lagu wiiqayo amniga gobolka, lagu xayirayo garoomada diyaaradaha, isla markaana lagu joojiyay mashaariicdii iyo adeegyo muhiim ah oo bulshada gobolka Gedo ay ku tiirsanaayeen.
Intii uu socday kulanka, waxaa sidoo kale la falanqeeyay arrimaha dib-u-heshiisiinta beelaha ee degmada Luuq, halkaas oo ay muddo dheer ka jirtay colaado sokeeye. Qaramada Midoobay ayaa ballan qaaday inay gacan ka geysan doonto gogol nabadeed oo la qorsheeyay in lagu qabto degmada Luuq bil gudaheed.
Mudane Maxamuud Sayid Aadan ayaa uga digay mas’uuliyiinta Qaramada Midoobay “cawaaqib xumo siyaasadeed iyo amni” oo ka dhalan karta ficillada dowladda Federaalka, isagoo sheegay in kooxda Villa Soomaaliya ay ka leexatay dastuurkii federaalka ee lagu heshiiyay.
Ugu dambeyn, Madaxweyne Ku-xigeenka Jubbaland ayaa ugu baaqay waxgaradka iyo shacabka reer Jubbaland inay mideeyaan codkooda oo ay ka hortagaan, sida uu hadalka u dhigay, “qorshaha guracan ee kooxda Muqdisho”, isagoo carrabka ku adkeeyay in “shakhsiyaad dano gaar ah leh aysan go’aamin karin masiirka shacabka Gedo iyo guud ahaan Jubbaland.”
