Jimco 29 Aug 2025 {RC} Xeer Ilaalinta Maxkamadda Ciidamada Qalabka sida ayaa Taliska qaybta Booliiska Gobolka Banaadir kala wareegtay Rag ku eedeysan in ay dilal ka gaysteen Magaalada Muqdisho oo lagu soo qabtay howlgallo ay sameeyeen Laamaha Ammaanka Caasimadda.
Booliiska Gobolka Banaadir ayaa dhowaan soo bandhigay Raggaan oo ugu dambeyn loo gudbiyay Xafiiska Xeer ilaalinta oo ka diyaarinaya Galdacwadeedka loo gudbiyo Maxkamadda Ciidamada Qalabka sida si kiiskooda loo mariyo hannaanka loogu talagalay kahor maxkamadda.
Maalmaha soo socda ayaa la filayaa in ay Raggaan kasoo muuqdaan Maxkamadda Ciidamada Qalabka sida iyaga oo haysta qareenno ka difaacaya eedaha uga imaanaya Xeer Ilaalinta oo kaashanaysa baarayaasha Kiiskaan.
Maxkamadda Ciidamada Qalabka sida ayaa dhowaan si isdaba-joog ah u dhagaysaneysay eedaha ka dhanka ah Rag iy dumar isugu jira Ciidamada Dowladda Federaalka iyo AS oo ku eedeysan dambiyo u badan dilal & qaraxyo.
Sidoo kale, Maxkamadda Ciidamada Qalabka sida ayaa todobaadyadii lasoo dhaafay kordhisay fulinta dilalka toogashada ah, waxaa weli xabsiyada lagu hayaa Dad xukun ku dhacay iyo kuwo maxkamad sugayaal ah oo maalmaha soo socda la guda galayo kiisaskooda.
