Golaha Wasiirrada Xukuumadda Federaalka Soomaaliya oo maanta yeeshay kulankooda ayaa ka hadlay xiisadda maalmihii u dambeeyay ka taagnayd magaalada Balad-Xaawo ee gobolka Gedo.
Golaha ayaa si gaar ah ugu bogaadiyey Ciidanka dowladda masuuliyadda iyo xilkasnimada ay muujiyeen intii lagu guda jiray xaaladda amni ee degmadaas. Sida lagu yiri warsaxaafadeed ka soo baxay shirka.
Sidoo kale, golaha ayaa ammaan u jeediyey qeybaha kala duwan ee bulshada deegaanka sida ay u garab taagan yihiin dowladnimada iyo dadaallada lagu sugayo nabadda iyo xasilloonida.
Kulanka Golaha Wasiirrada ayaa lagu ansixiyey Xeer-Nidaamiyaha Dhijitaalka ee Nidaamka Maareynta Maaliyadda iyo Xisaab-xirka sanadeedka 2024.
Ugu dambeyn, kulanka oo uu guddoomiyey Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa lagu adkeeyey in cid kasta oo carqalad ku ah nabadda iyo deganaanshaha ay si toos ah uga hor imanayso dagaalka Al-Shabaab.
