Xiisad colaadeed ayaa saaka weli ka taagan degaanada Maygaagta, Jiicboor iyo Saaxquran ee ka tirsan galbeedka gobolka Mudug halkaasi oo shalay ay ku dagaalamayeen labo maleeshiyo beeleed oo ka soo kala jeeda Puntland iyo Galmudug.
Warar dheeraad ah ayaa ka soo baxaya khasaaraha ka dhashay dagaalkii shalay waxaana wararka ay sheegayaan in ugu yaraan 10 qof ay ku geeriyoodeen, halka tiro intaasi ka badana ay ku dhaawacmeen.
Dadka ku dhaawacmeen ayaa loo kala qaaday deegaanada ka tirsan Galmudug iyo Puntland, iyadoona halkaasi lagu dabiiyo.
Wararkii ugu dambeeyay ayaa sheegaya in saaka dhinacyada ay isku hor fadhiyaan deegaanada ay ku dagaalameen, iyadoona laga cabsi qabo in markale uu dagaal culus ku dhexmaro galbeedka G/Mudug.
Dagaalka ayaa salka ku haya muran la xiriira cida maamuleysa Jiicboor oo ah dhul abaar ah oo aan laheyn wax nafci ah kuna wanaagsaneyn, iyadoona dagaalada halkaasi ka dhacaya ay saameyn ku yeesheen nolasha dad badan, kadib markii ay ku geeriyoodeen dagaalada.
Waxaa socda dedaalo lagu doonayo in lagu joojiyo colaada oo ay wadaan waxgarad ka tirsan labada beelood iyo masuuliyiinta labada Maamul ee Galmudug iyo Puntland inkastoo aan weli lagu guuleysan in xabada la joojiyo.
Labada beelood ayaa horey loogu heshiisiiyey gogol ay dhigeen maamulada Puntland iyo Galmudug hase ahaatee heshiiskaas ayaan muddo kooban ka dib burburay ka dib maleeshiyo ka tirsan labada beelood ay dilal isku geysteen.
