Wararka ka Imaanaya duleedka Raaskambooni ee gobolka Jubada Hoose, ayaa shegaya in halkaasi uu dagaal ka dhacay kaas oo u dhaxeeya ciidamada dowladda federaalka Soomaaliya iyo kuwa maamulka Jubaland .
Ilaa iyo hadda si dhab ah looma xaqiijin karo khasaaraha ka dhashay dagaalka iyo cidda wareeka qaadday maadaama is gaarsiinta deegaanku ay go’antahay, hase-yeeshee warbaahinta maamulka Jubaland ayaa baahiyay in fariisimada ciidamada maamulkaas weerarka lagu soo qaaaday.
Ma jiro wax war ah oo dhanka dowladda federaalka ka soo baxay oo ku saabsan dagaalka Raaskambooni.
Isku dhacaan labada ciidan ee dowladda dhexe iyo Jubaland ayaa imaanaya iyadoo khilaafka labada dhinac uu cirka isku sii shareerayay tan markii ay dowladdu bilowday in ay ciidamo ku daabusho gobolka Jubada Hoose, kuwaas oo dowladdu ay ku sheegtay in ay amniga kala wareegayeen ciidamada ATMIS ee halkaa saldhigyada ku lahaa.
