Shil sababay dhimasho iyo dhaawac ayaa barqanimadii Maanta ka dhacay meel ku dhow Isgoyska Siinaay dhinaca wadada Jenaraal Duu’uud ee degmada Boondheere ee Gobolka Banaadir, waxaana kasoo baxaya faah faahino.
Dad goobjoogayaal ah oo la hadlay Idaacadda Dalsan ayaa u sheegay in shilkaas uu ka dambeeyay, kadib markii ay isku dhaceen laba mooto Bajaaj oo ku socday si xowli ah, kuwaasi oo ay saarneeyeen dad raiyd ah.
Hal qof ayaa ku geeriyooday shilkaas, laba qof kalena dhaawacyo ayaa soo gaaray, kuwaas oo kala saarnaa labada Mooto ee isku dhacay, waxaana gurmad u sameeyay dad shacab ah oo goobta ka Agdhawaa.
Wadada Jenaraal Duu’uud ee dhawaan dib u dhiska lagu sameeyay ayaa waxaa dhowr jeer ka dhacay shilal khasaaro geystay, waxaana shilalkaas ay ka dhasheen gaadiidka oo xawaaro loo waday, xili wadadaas aysan laheyn Askari Jiifo, gaadiidkana loogu wado xawaare dheereeya.
