Ciidamada Daraawiishta Dowlad Goboleedka Jubbaland ayaa waxaa ay howlgallo kala duwan oo ka dhan ahaa Ururka Al-Shabaab ka fuliyeen deegaano ka tirsan Gobolka Jubbada Hoose oo qaarkood ay ku sugnaayeen Xubno ka tirsan Al-Shabaab.
Saraakiisha Ciidamada Jubbaland ee howlgalka hoggaamineysa ayaa waxaa ay Warbaahinta u sheegeen in howlgallada laga fuliyey deegaannada kala ah, Beer-Xaani, Qudus, Kaamjaroon iyo Janaay Cabdallle,isla markaana aysan la kulmin wa iska caabin ah.
Saraakiishu waxaa ay sheegeen in howlgalkaas uu ahaa mid amniga lagu xaqiijinayey,isla markaana Ciidamada Daraawiishata dowlad Goboleedka Jubbaland ay ku doonayaan inay Al-Shabaab kaga saaraan deegaannada Gobolada Jubbooyinka.
Dhawaan ayay aheyd markii Ciidamada Danab ee xoogga dalka iyo kuwa Jubbaland ay howlgallo qorsheysan ka fuliyeen tuulooyin hoostaga degmada Jamaame ee Gobolka Jubbada Hoose,halkaas oo xarumo waaweyn ay ku leeyihiin Al-Shabaab.
