Warar dheeraad ah ayaa waxaa ay kasoo baxayaan dagaal culus oo xalay Gudaha Magaalada Jowhar ee Caasimadda Hir-Shabeelle ku dhex-maray Ciidamo ka tirsan kuwa Dowladda Soomaaliya iyo kuwa AMISOM oo dhinac ah iyo Xubno kamid ah Al-Shabaab.
Dagaalka ayaa yimid,kaidb markii ay Al-Shabaab weerareen Saldhig Ciidamada Dowladda iyo kuwa AMISOM ku leeyihiin halka lagu Magacaabo Nambar Uuna oo ka tirsan Xaafada Horseed ee Magaalada Jowhar,waxaana dadka degmadaas qaarkood ay sheegeen in dagaalka uu socdey ku dhowaad Hal Saac.
Wararka la helayo ayaa waxaa ay sheegayaan in hal askari uu ku dhaawacmay dagaalka ka dhacay Gudaha Magaalada Jowhar,kaas oo dhex-maray Ciidamo ka tirsan kuwa dowladda oo ay wehlinayeen Ciidamada AMISOM iyo Ururka Al-Shabaab,balse dadka Magaalada ayaa waxaa ay sheegayaan in uu jiro khasaaro soo gaarey dad Shacab ah.
Dhinaca kale Wasiirka Amniga Hir-Shabeelle Maxamed Cabdi raxmaan Kheyre oo ka hadlayay dagaalka ayaa sheegaya in Xubno ka tirsan Al-Shababa ay so weerareen Koontorool laga soo galo Magaalada Jowhar,hayeeshee Ciidamada Dowladda iyo kuwa AMISOM ay iska difaaceen.
Wararkii ugu dambeeyey ee saaka ana ka heleyno Magaalada Jowhar ee Caasimadda Hir-Shabeelle ayaa waxaa ay sheegayaan in xaaladu ay tahay mid degan,hayeeshee Magaalada laga dareemay dagaalkii xalay ka dhacay.
