Ciidamo ka tirsan kuwa Booliska Soomaaliya ayaa waxaa ay xalay howlgal dad badan lagu qabqabtay ka sameeyeen Xaafado ka tirsan degmada Boondheere ee Gobolkan Banaadir.
Ciidamada oo watay gaadiidka noocyadiisa kala duwan ayaa waxaa ay howlgalka ka sameeyeen Xaafadaha ku teedsan laga bilaabo Isgoyska Taalada Daljirka Daahsoon ilaa Afarta Darjiino,waxaana howlgalka lagu qabqabtay dad u badan Dhalinyaro.
Ciidamada ayaa intii ay howlgalka ku jireen waxaa ay mararka qaar ay gelayeen Guryaha qaarkood,waxaana la sheegay in Ciidamada ay dad ka wateen guri ku yaalla Agagaarka Tabeelaha Jaceylka.
Dad ku sugnaa xilliga howlgalka uu socday qeybo kamid ah degmada Boondheere ayaa waxaa ay Risaala u sheegeen inay arkeen Tiro dhalinyaro ah oo Ciidamada ay ku wateen Gaariga Shabaqlaha ah,kuwaas oo la qabtay intii uu howlgalka socday.
Laamaha Amniga Soomaaliya weli ma faah faahin waxyaabaha ay howlgalkaas kusoo qabteen,hayeeshee Todobaadkii la soo dhaafay ayaa Ciidamada Dowladda waxaa ay howlgallo ka fuliyeen degmooyinka,Warta-Nabadda, Waaberi,Xamar Jajab, Xamarweyne, iyada oo xalay laag fuliyey degmada Boondheere ee Gobolkan Banaadir.
