Madaxweynaha dowlad Goboleedka Jubbaland Axmed Maxamed Islaam (Axmed Madoobe) ayaa ka hadlay Qaraxii saakay ka dhacay Isgoyska Ex-koontarool Afgooye ee Magaalada Muqdisho.
Qaraxaas oo ahaa mid loo adeegsaday gaari nooca xamuulka qaada ah oo laga soo buuxiyay waxyaabaha qarxa aya geystay Khasaaro aad u badan oo isugu jira dhimasho iyo dhaawac.
Madaxweyne Axmed Madoobe ayaa tacsi u diray ehelada dadkii waxyeeladu kasoo gaartay Qaraxii ka dhacay isgooyska EX Contoral Afgooye halkaas oo ay ku naf waayeen Dad shacab ah oo u badnaa arday u socotay goob waxbarasho, kuwaasi oo ay ku jireen Arday dhigaanayay Jaamacadda Banaadir.
Waxaa uu Madaxweynahu xusay in uu xanuunka la qaybsanayo ehelada dadkooda ku waayay masiibadan halkaas ka dhacday.
Sidoo kale Axmed Madoobe wuxuu dadka halkaas ku geeriyooday Allah uga baryay in uu naxariistii jano ka waraabiyo sidoo kalana kuwa dhaawaca ah ayuu u rajeeyay Caafimaad deg deg ah.
In ka badan 30-ruux ayaa ku geeriyootay qaraxaas Ismiidaaminta ahaa, halka ku dhawaad 100 qof ay ku dhaawacmeen, kuwaasi oo u badan dad shacab ah oo xiligaas goobta ku sugnaa.
