Wararka Radio Cadaado ay ka heleyso Gobolka Mudug ayaa sheegaya in kaalin shidaal oo ku taalla deegaan ka tirsan Gobolkaas uu xalay ka kacay dab xoogan.
Kaalinta Shidaal ee uu Dabka ka kacay ayaa ku taalla deegaan lagu magacaabo Bandiiraladley ee Gobolka Mudug, isla markaana waxaa la tilmaamay in dab uu ahaa mid xoogan.
Dadka deegaanka ayaa sheegay in foostooyin shidaal ah ay qarxayaan, isla markaana uu cirka isku shareeray qiiq madow oo kaalinta shidaal ka baxayay.
Sidoo kale dadka deegaanka ayaa xusay in aan la ogeyn sababta keentay inuu dabkaas ka kaco kaalinta shidaal ee ku taalla deegaanka Bandiiraladley.
Ilaa iyo hadda si rasmi ah looma xaqiijin Khasaaraha ka dhashay dabkaan ka kacay kaalinta ku taalla Bandiiraladley, Maadaama uu bilowday xilli habeen ah.
