Wasiirka arrimaha dibedda Soomaaliya Axmed Ciise Cawad ayaa faah-faahin ka bixiyey kulankii ay maanta magaalada Nairobi ku yeesheen madaxweyne Farmaajo iyo madaxweynaha Kenya Uhuru Kenyatta.
Cawad oo wareysi siiyey VOA ayaa ku adkeystay in la isku raacay in labada dal ay xiriir wanaagsan yeeshaan, oo kiiska maxkamadda ICJ uusan wax saameyn ah ku yeelan.
“horta aniga dhigeed baan ahay, Soomaalida waxey u jeceshay inay Wasiirka kale maqasho, Wasiirka dalkeedana u maqli waayaan waa Su’aalo u baahan in nafteenu fiirino, Gabadha Wasiir weeye, Anigana wasiir baan ahay, waxaan kuu sheegayaa waxyaabihii lagu wada hadlay, waxaan kaloo kuu sheegay in Madaxweynayaasha oo Wasiirada ka muhiimsan oo iyagu madaxda ugu sareeya dalalkaas ah oo codadkooda duubnan yahay” ayuu yiri Wasiir Cawad.
Axmed Ciise Cawad ayaa dhinaca kale ka meer maaray inuu si toos ah uga Jawaabo su’aal ku saabsaneyd in laga heshiiyay dacwadii dhawaan Xukuumada Muqdisho ay ka gudbisay Kenya ee la xiriirtay Doorashadii ka dhacday magaalada Kismaayo oo mas’uuliyiin Kenyan ay jabiyeen xanibaadii dhinaca duulimaadyada toos ahaa ee Kismaayo.
Dood ayaa ka dhalatay heshiis galabta ay kula saxiixdeen Magaalada Nairobi ee Caasimadda dalka Kenya dowladdaha Soomaaliya iyo Kenya.
Labo Warsaxafadeed oo kasoo kala baxay Madaxtooyadda Kenya iyo tan Soomaaliya ayaa dhaliyay dood qabsatay baraha bulshadda taasoo ku aadaneyd dacwadda badda ee labada dal.
Dooda ayaa timid ka dib markii hadal aysan shaacin Madaxtooyadda Soomaaliya ay shaacisay Madaxtooyadda Dowladda Kenya taasoo si rasmi ah u xaqiijisay in Madaxweynaha Soomaaliya Maxamed Cabdullaahi Farmaajo uu muujiyay Kalsoonida uu ku qabo Dacwadda badda ee taalla Maxkamada ICJ lagu xaliyo qaab wada ogol ah oo ah habkii ay horay dowladda Kenya u Codsatay.
