Waxaa Maalinba Maalinta ka dambeeysa sii kordhaya dilalka dadka Soomaaliyeed ee Ganacsi ahaan u tegay dalka Koonfur Afrika ay u geysanayaan Kooxaha Burcada u dhashay dalkaas, iyada oo Todobaadkaan Gudihiisa la dilay dhowr qof oo Soomaali ah.
Magaalooyinka Cape Town Iyo Port Elizabeth ayaa 48-dii saac ee la soo dhaafay waxaa lagu dilay Muwaadiniin Soomaaliyeed oo lagu kala Magacaabi jiray Aadan Cabduqaadir Jaamac, Macalin Cabdullaahi Ciise iyo Cabdi Jibaar Maxamed Nuur.
Sasddexdaan Ruux ee Soomaalida ah ayaa dhamaantood waxaa Kooxaha Burcad Koonfur Afrikaanka ah ay ugu tageen Goobahooda Ganacsiga , iyaga oo si kala gooni gooni ah u dilay kadibna ay ka qaateen lacag farabadan iyo Agab kale oo ku yaallay Xarumahooda Ganacsi.
Sidoo kale Burcada Koonfur Afrikaanka ah ayaa waxaa ay dhaawaceen laba Ruux oo Soomali ah,iyaga oo intaasi kadib goobta ka baxsaday,waxaana tani ay walaac xoogan ku abuurtay Soomaalida Ganacsi ahaan u joogta dalka Koonfur Afrika.
Wararka la helayo ayaa sidoo kale waxaa ay sheegayaan in Gudaha dalkaasi Koonfur Afrika dhawaan laga hirgeliyay Xarumo gal baaris ah oo ay booliska leeyihiin si gacanta loogu soo dhigo dadka dilalka u geysta dadka Ajaanibta ah ee ku sugan dalka Koonfur Afrika.
