Hoggaamiyaha Aqlabiyadda Barlamaanka Kenya, Aadan Barre Ducaale waxa uu Muslimiinta ka codsaday inay indhaha ku hayaan Go’aankii Maxkamadda Sare ee aan Ardayda gabdhaha Muslimiinta loo oggolaan doonin inay Xijaabka ku xirtaan Dugsiyadda dadka aan Muslimka ahayn.
Ducaale oo shalay ka hadlay magaalladda Garissa waxa uu tilmaamay in xukunkaasi meesha ka saarayo Xuquuqda Gabdhaha Muslimiinta ee ku cad Dastuurka Kenya.
Wargeyska The Star ayaa qoray in Aadan Barre Ducaale oo ah Xildhibaan laga soo doorto magaalladda Garissa uu sheegay inuusan qofna xaq u lahayn inuu soo fargeliyo arrintaasi, wuxuuna yiri: “Annaga, Muslimiinta waxaan sii wadi doonaan inay Carruurteenna xijaabka ku aadan Dugsiyadda”.
Wargeyska waxa sii raaciyey inuu Adaan Ducaale sheegay inay Maxkamaddu ka fekerto arrimaha muranada Doorashadda, balse ma aha Diinta oo uu xusay inay tahay lama-taabtaan.
Dooda Xijaabka Ardayda Muslimiinta timid, kadib, markii ay Maxkamadda Sare ee Kenya Khamiistii hore laashay Xukun ay Maxkamadda Rafcaanka ku go’aamisay inay Ardayda Muslimiinta xijaab ku tagaan Dugsiyadda.
3 Arday Muslimiin ayaa laga joojiyey sannadkii 2014-kii Dugsi Sare oo ku yaalla magaalladda Isiyoola, kadib, markii ay xirteen Qamaarka ay Haweenka Muslimiinta xirtaan.
Xukunka Maxkamadda Sare ee Kenya waxa uu fal-celin adag ka dhex maray gudaha dadka Muslimiinta ee ku nool gudaha dalkaasi.
