Wakiilka gaarka ah ee Qaramada Midoobay Arrimaha Soomaaliya Amb. Micheal Keating iyo Ergayga Gaarka ah ee Midowga Afrika u fadhiya Soomaaliya Francisco Caetano Madeira ayaa kulan ku yeeshay magaalada Muqdisho ee caasimadda Soomaaliya.
Kulanka oo sidoo kale ay qeyb ka ahaayeen saraakiil kale oo ka kala socotay Qaramada Midoobay iyo Midowga Afrika, socdayna mudo saacado ah ayaa waxaa looga hadlay xoojinta wada shaqeynta labada dhinac, xasiloonida Soomaaliya, iyo in la dardar geliyo arrimaha ammaanka.
Danjire Madeira ayaa sheegay shaqada AMISOM ay u joogto Soomaaliya in ay tahay nabadeynta dalka iyo la dagaalanka ururka Al-shabaab, isaga oo sidoo kale tilmaamay howlgalka ciidamada AMISOM in uu wajahayo marxalad cusub.
Wuxuu kaloo sheegay Francisco Caetano Madeira in dhowaan ay qorsheynayaan qaadista dagaalo lagu wajahayo Ururka Al-shabaab, si taasi ay u hirgashana Beesha Caalamka oo ay ugu horeyso QM ayuu ka dalbaday in ay siiyaan taageere dhaqaale iyo mid Millitari.
Amb. Micheal Keating Wakiilka gaarka ah ee Qaramada Midoobay Arrimaha Soomaaliya ayaa sheegay muhiim in ay tahay in laga wada shaqeeyo sidii ay Soomaaliya u noqon lahayd Dowlad waxtar leh, oo si toos ah u qaada dhabaha Nabadda.
“Waxaan kulan la yeelanay Danjire Caetano iyo kooxdiisa, waxaan ka wada hadalnay wada shaqeynta naga dhaxeysa ee ku qotonta arrimaha Soomaaliya, ammaanka Soomaaliya, xasiloonida dalka, ujeedada kulanka wuxuu ahaa sidii loo dardar gelin lahaa nabadeynta ka socota Soomaaliya.” Ayuu yiri Keating oo war qoraal ah ku soo qoray bartiisa Twitter-ka.
W/Dh.Wariye Nuuradiin Nadka
