Waxaa caawa la ciyaarayaa kulamadii ugu danbeysay ee wareega group-yada Champions League ee xilli ciyaareedkan iyadoo si dhab ah loo xaqiijin doono 16ka kooxood ee u soo gudbay wareega xiga iyo weliba kooxaha ku soo kala baxay kaalimaha 1aad iyo 2aad.
Laakiin goormaa ayaa la qabanayaa isku aadka wareega 16ka Champions League?
Wax walba oo aad ugu baahan tahay inaad ka ogaato ayaan halkaan hoose kuugu soo koobnay.
Goormaa la qabanayaa isku aadka wareega 16ka?
Isku aadka wareega 16ka Champions League waxa uu dhacayaa maalinta Isniinta ee 12ka December Saacada Geeska Afrika marka ay tahay 2pm, iyadoo lagu qaban doono magaalada Nyon ee dalka Switzerland.
Halkeed kala socon kartaa?
Isku aadka waxaa baahin doona Sky Sports News iyo beIN Sports laakiin haddii aadan u dhaweyn telefishin, anaga ayaa si toos ah kula socodsiin doonaa isku aadka iyo wax walba oo ku saaban haddii Eebe idmo.
Sidee ayuu isku aadka u shaqeeyaa?
Waa mid aad u sahlan, kooxaha kaalinta 1aad kaga soo baxay group-yadooda ayaa ku dhacaya kooxaha kaalinta labaad kaga soo baxay group-yadooda.
Laakiin sharuud ayaa ku xiran, kooxihii isku group soo ahaa iskuma dhici doonaan, halka kooxaha isku wadanka ah ay iyagana isku arki doonin wareega 16ka.
Kooxaha ku soo baxay kaalinta 1aad ee group-kooda ayaa lugta h–e ee wareega 16ka ku ciyaari doona garoonka martida halka lugta labaad ay ku dheeli doonaan gurigooda.
Kooxaha u soo baxay isku aadka?
Kooxaha kaalinta koowaad ku soo baxay: Arsenal, Napoli, Barcelona, Atletico Madrid, Monaco, Leicester City
Kooxaha kaalinta labaad ku soo baxay: Paris Saint-Germain, Benfica, Manchester City, Bayern Munich, Bayer Leverkusen
Kooxaha boosaskooda go’aansan doona: Borussia Dortmund iyo Real Madrid waa ay ka soo baxeen Group F laakiin kooxdii kaalinta koowaad ku soo bixi laheyd ayaa la go’aansanayaa caawa.
Midkood Porto ama Copenhagen ayaa kaalinta labaad ee Group G ku soo bixi doona.
Juventus waa ay ka soo baxday Group H laakiin waxa ay caawa u ciyaarayaan inay xaqiijistaan booska kaalinta koowaad, halka Sevilla iyo Lyon ay u dheelayaan u soo bixitaanka wareega 16ka.
Goormee la ciyaarayaa wareega 16ka?
Champions League waxa uu fasax galayaa muddo labo bilood ah, lugta h–e ee wareega 16ka waxaa la ciyaarayaa 14-15ka Febraayo iyo 21/22 Febraayo, halka lugta labaad la ciyaari doono bisha March 7/8 iyo 14/15.
