Jubbaland oo gacanta kusoo dhigtay Maandooriye badan & Raggii watay

0
141

Ciidanka Booliska dowlad Goboleedka Jubbaland ayaa gacanta kusoo dhigay Maandooriye xashiish ah oo  142KG gaaraya, kadib howlgal ay ciidamada ka sameeyeen magaalada Kismaayo ee Xarunta Gobolka Jubbada Hoose.

Maandooriyaha Xashiishkan ayaa lagu soo qabtay laba eedaysane iyo gaari nooca Soomaalidu u taqaan Afjiir oo ay kusoo qariyeen.

Xashiish-kan ayay saraakiishu sheegeen in lagu soo qariyey gaariga, waxaana dusha laga saaray ciidda guryaha lagu dhiso, si ciidamada Ammaaka looga qariyo.

“Dadka ka ganacsada walxaha maanka dooriya ayaa inta badan isku daya in ay adeegsadaan tabo kala duwan si ay laamaha ammaanka uga qariyaan ganacsigooda sharci darrada ah, balse ciidama Booliska oo loo tababaray kahortagga walxaha halista ku ah shacabka ayaa fashiliya qorshe walba oo ay isku dayaan” ayaa lagu yiri Qoraal Booliska Jubbaland ay soo saareen.

Ciidamada Booliska dowlad Goboleedka Jubbaland ayaa intaas kusii daray inay sii wada doonaan howlgalada lagula dagaalamayo waxyaabaha maanka dooriya iyo ka hortagga wax walba oo amniga liddi ku ah.